Light Portal
 |
| წყარო |
ცალმხრივი გზების მიდევნების მეთოდისათვის განათების ოპტიმალური შერჩევა არის ერთ-ერთი უმნიშვნელოვანესი ფაქტორი რენდერის პროცესში. როგორც უკვე ვიცით როდესაც განათების წყარო პატარაა მხოლოდ BSDF-ის შერჩევით გზების მიდევნება ძალიან არაეფექტურია. ასეთ შემთხვევაში MIS-ის საშუალებით განათების და BSDF-ის შერჩევების გაერთიანება ბევრად კარგ შედეგს იძლევა. უნდა აღინიშნოს, რომ განათების შერჩევის მეთოდის ეფექტურობა ასევე დამოკიდებულია განათების ხილვარობაზე და იმ შემთხვევაში, როდესაც შერჩეულ განათებას შეფერადების წერტილიდან რაიმე ეფარება ამ განათების შერჩევაზე დახარჯული რესურსი ფაქტიურად გაფლანგულია. მაგალითად გვაქვს სცენა ერთი გარემომცველი განათებით, ასევე გვაქვს გეომეტრია, ფანჯრებიანი ოთახი, კამერა მოთავსებულია ოთახში, შესაბამისად განათება რომელიც მოდის გარედან მხოლოდ ფანჯრის გავლით აღწევს ოთახში და ხვდება კამერაში. ეს განსაკუთრებით რთულ შემთხვევას წარმოადგენს, რადგან BSDF-ის შერჩევა ხშირ შემთხვევაში წარუმატებლად მთავრდება, რადგან რენდერერი ვერ პოულობს ოთახიდან გასასვლელს. განათების შერჩევის მეთოდიც ძალიან არაეფექტური ხდება, რადგან ოთახის შიგნიდან გარემომვცელი განათების მხოლოდ ძალიან მცირე ნაწილი ჩანს. შესაბამისად როდესაც ცალ-ცალკე ორივე მეთოდი არაეფექტურია MIS-ით ამ ორი მეთოდის გაერთიანება დიდად ვერ გვეხმარება.
 |
| შიდა სცენა, განათების პორტალით(მარჯვენა) და მის გარეშე(მარცხენა) cycles რენდერერში.
განათების პორტალი არის რენდერერის ერთ-ერთი ელემენტი, რომლის საშუალებითაც მომხმარებელი ეხმარება რენდერერს განათების მნიშვნელოვნობით შერჩევაში. მაგალითად ზემოთ გამხილულ შემთხვევაში, როდესაც ვცდილობთ ოთახის დარენდერებას, განათების პორტალი უნდა განლაგდეს ფანჯრებთან ისე რომ სრულად ფარავდეს ადგილს საიდანაც სინათლე ოთახში აღწევს. რენდერის პროცესში რენდერერი დამატებით მოახდენს სხივების გაშვებას პორტალის მხარეს იმ იმედით, რომ ამ მიმართულებით ის იპოვის განათებას. ზემოთ მოცემულ სურათზე ნაჩვენებია ოთახის რენდერი cycles რენდერერში პორტალი გამოყენებით და მის გარეშე.
პორტალების გამოყენება დამატებით სიფრთხილეს მოითხოვს: უნდა გვახსოვდეს რომ პორტალის შერჩევა დამატებით გამოთვლებთანაა დაკავშირებული და რენდერს ანელებს ასე რომ მისი გამოყენება უნდა მოხდეს მხოლოდ მაშინ როდესაც ის საჭიროა. ასევე გასათვალისწინებელია, რომ როდესაც ფანჯარა დიდია პორტალის გამოყენება შესაძლოა წამგებიანიც კი იყოს, ასევე არაეფექტურს გახდის რენდერს ბევრი პორტალი ერთ სცენაში.
|
Comments
Post a Comment